الذكــاء الاصطناعــي 🦾💕 : ما مفهــومه ؟ و ما طبيــعته ؟

---

في الأيام الأخيرة، صار غالباً ما يتردد علينا كثير مصطلح الذكاء الاصطناعي، تقنيات كثيرة تمر علينا في حياتنا و يقولون لنا نظامها يعتمد على الذكاء الاصطناعي، مجالات مختلفة عن بعضها بس كلها تندرج تحت سقف الذكاء الاصطناعي !

طبعاً الا ما تكونون سألتوا أنفسكم في يوم، ايش هو الذكاء الاصطناعي 🤷🏻‍♀️|🤷🏻 ؟ و ايش طبيعته ؟ ‫دايما نشوف الروبوت رمز له، هل هو عشانه بس يخص الروبوتات 🤖؟!

في هالتدوينة راح نحاول نوضح لكم بشكل مبسط هذا المجال و نعطيكم خلفية عنه. في البداية، الذكاء الاصطناعي 🧠 و اللي يرمز له 'AI' كإختصار لـ (Artificial Intelligence)، نقدر نعرفه بأنه محاولة محاكاة و مجاراة الذكاء البشري من خلال الآلات أو انظمة نبنيها و نصممها بالشكل اللي يخليها قادرة على تنفيذ مهام و أعمال مشابهه لأعمال الإنسان سواء كانت بسيطة، معقدة، متعددة، أو تتركز على مهمـة وحده. مثل ان يكون عندها القدرة على انها تتعلم، تفكر، تستنتج، تستوعب طبيعة المكان المحيط فيها، و حتى ممكن انها تعطي ردود فعل على أمور ما تبرمجت عليها من قبل بس بناءاً على خبرة سابقة.

كثير أشخاص يتساءلون حول طبيعة البرمجة في هذا المجال، و ايش فرقها عن البرمجة التقليدية في بناء الأنظمة 💻 ؟؟

غالباً الأنظمة المبنية على البرمجة التقليدية تلقـّـن بكود و قواعد معينة ثابتة و تنفذ وظائف محددة و ممكن تتطور لكن من خلال الإنسان و التعديلات اللي يضيفها على الكود. و بناءاً عليها، يقوم الكمبيوتر بالتنفيذ. أما الأنظمة المبنية باستخدام تقنيات الذكاء الاصطناعي، فكرتها ان الأنظمة في البداية يتم بناءها و تكوينها بواسطة الإنسان بحيث يعلمها و يدرسها بالشكل اللي يخليها مستقبلاً تطور من نفسها من خلال اللي تعلمته بدون تدخل أي طرف بشري و القدرة على حل مشاكل غير مألوفة لها أو انها تكون قريبه للي تعلمته يعني نحاول نخليها تعتمد على نفسها، متجددة، وما تكون في رتم واحد.

الـ 'AI' بحد ذاته نقدر نقسمه إلى قسمين بناءاً على طبيعة عمله، إما قوي 🤖 أو ضعيف 👾:

‏• قــوي - Artificial general intelligence

نظام له قدرات معرفية تشبه قدرات الإنسان و يقدر يتصرف مع المشاكل و يلقى لها حل بنفسه بدون تدخل بشري، وغالباً الوظائف اللي يسويها غير مألوفة (Unfamiliar task).

‏• ضــعيف - Narrow AI

نظام صمم و دُرب لغرض و وظيفة معينة (Virtual personal assistants) و أقرب صوره ممكن تصفه و معظمنا تعامل معه هو Apple's Siri.

صُــنِف الذكاء الإصطناعي إلى أربعة أنــواع، في بعضها طُبقت على أرض الواقع و نشوفها في تقنيات كثيرة حولنا و بعضها لسى ما انوجد :

١- آلات رد الفعل (Reactive machines) :

الآت قادرة على اجراء تنبؤات لكن ما عندها ذاكرة تحفظ فيها التجارب السابقة عشان تستفيد منها باتخاذ أي قرارات في المستقبل، أفضل مثال يوصفها هي لعبة الشطرنج IBM ♟، الآله في البداية تتعرف على القطع اللي على لوحة الشطرنج و بعدها تحلل التحركات اللي من الممكن تتحركها أو يتحركها خصمها و بعدين تختار الخطوة اللي تشوفها استراتيجية و مناسبة.

٢- ذاكرة محدودة (Limited memory) :

الآلات تعتمد على الخبرات السابقة الموجودة قي الذاكرة المؤقتة في اتخاذ قراراتها المستقبلية. و أشهر مثال عليها، سيارات ذاتية القيادة بحيث يكون اعتمادها الكلي على ملاحظاتها في الإجراءات اللي من الممكن تصير في المستقبل القريب، مثلاً لو مشت بإتجاه معين و اعترضها جدار راح تخزن في ذاكرتها ان في هذا الاتجاه المعين في جدار بحيث تكون منتبهه له المرة الجاية.

٣- نظــرية العقل (Theory of mind) :

يكون القرار اللي تتخذه الآلة متأثر بمعتقداتها، رغباتها و نواياها. و هذا النوع من الذكاء الاصطناعي لحد الآن مو موجود.

٤- الوعــي الذاتي (Self-awareness) :

في هذا النوع، الآله يكون عندها شعور بالذات، وعي، و القدرة على انها تفهم ايش حالتها في الوقت الحالي و بعد تقدر تستخدم المعلومات عشان تفهم مشاعر الآخرين اللي حولها، أيضاً هذا النوع من الذكاء الاصطناعي لحد الآن مو موجود.

أمــثلة على تقنيات الذكــاء الاصطناعــي :

• التشــغيل الآلـي ( Automation ):

جعل نظام أو عملية تعمل بشكل تلقائي يعني مـثلاً تنفذ مهام كبيرة مع تكرارها، و عادةً يكون الإنسان يسويها.

مثال عليه: (Robotic Process Automation (RPA

• تعــلم الآلــة 📟 ( Machine Learning ):

هو علــم يعطي الحاسب القدرة على التعلم بدون برمجة مباشرة أو من قِــبل احد، فقط يعتمد على تدريب و تعليم الآلة باستخدام بيانات تخص المهمة اللي يبيها تسويها، و في المستقبل تكون قادرة على إتخاذ أي قرارت حول هذي المهمة، حل مشاكل تصادفها فيها، او ممكن تتنبأ بأي حدث ممكن يصير فيها و كل هذا بس باستخدام اللي سبق تعلمته من قبل، و يعتبر التعلم العميق فرع من فروعه.

• رؤيــة الآلــة 📷 ( Machine Vision ):

هذي التقنية تاخذ الصور و المعلومات المرئية، تحللها، و تحولها من تناظرية إلى رقمية بحيث أي خلل يصير في الإشارات الرقمية تعالجه و كل هذا يصير باستخدام الكاميرا. و مثال عليها: التعرف على التوقيع أو الصور الطبية.

• معالجــة اللـغة الطـبيعية 🎙📠 ( Natural language processing ) أو (NLP):

هذي التقنية تهتم بتوفير تفاعل جيد بين الكمبيوتر و لغات البشر بحيث يقدر يفهمها و يتجاوب معها سواء كانت نصية أو صوتية، و من اشهر تطبيقاتها التعرف على الكــلام (Speech recognition) مثل نظام Siri الموجود في جوالات iPhone، و التنبؤ بالكلمات (Word Prediction) غالباً تستخدم في محركات البحث مثل Google، و فكرتها لما تبحث عن شي معين و تكتب الكلمة الأولى راح يتنبأ بالكلمة اللي ممكن راح تكتبها و يعطيك كل الخيارات الممكنة و المتاحة.

• الروبــوتات 🦾🦿 ( Robotics ):

تندرج في تصميمها و تصنيعها تحت المجال الهندسي بالعادة، و يكون الغرض من تصنيعها هو اداء المهام الصعبة و اللي ممكن فيها خطر على حياة الإنسان او المهام اللي لازم تتنفذ باستمرار (متكررة)، يدخل في بناء الروبوتات اللي تكون متفاعلة في البيئات الاجتماعية تعلم الآلة. و مثال عليها: الآلات المستخدمة في خطوط التجميع لإنتاج السيارات.

تطبيقات تخصص الذكاء الاصطناعي كثيرة، و صعـب جداً نحصرها في مجالات معينة ..!

لان ببساطه، نقدر نستخدم تقنياته لأي عمل يتطلب قرار معين او تنفيذ مهمه محدده و راح يكون تفاعل و تجاوب هذا العمل بواسطة الكمبيوتر المدعوم بتقنيات الذكاء الاصطناعي بدال ما يكون من خلال تدخل الانسان. ومن الأمثلة على استخدامات هذي التقنية في بعض المجالات:

• التعليم: تحديد نقاط ضعف الطلاب والمساعدة في تطويرها.

• الطب: تشخيص الأمراض.

• التجارة: تحليل سلوك المشترين.

• الصناعة: الروبوتات وأنواعها المتعددة.

كثير من الناس عندهم مفهوم خاطئ و تخوّف رهيب من فــكرة إن ..

الآلات إذا صار لها إدراك مشابه للإنسان و تسـوي أعمال و وظائف يسويها الإنسان، ممكن انها تحل مكانه و تمحي وجوده في الحياه 🤖 !!

هذا شي غلط ❌ ، لان الانسان هو الأساس دائما و هو السبب في وجودها و إعطاؤها قيمة فعلية و بدونه مين راح يطورها 📈؟ يزودها بمعلومات ضروري تعرفها 📚؟ يسوي لها صيانه لو خربت 🛠؟ هل معقولة راح تقدر تسوي كل هذا بدون الانسان 🤷🏻‍♀️|🤷🏻؟ ممكن تبدل دور الانسان و تخلق وظيفة أخرى له لكن ما تنفي دوره أبداً، فمثلا بدال ما يكون يسوي الشغل هو بنفسه راح يكون مشرف على هذي الآله و يراقب سير عملها، فالغرض الأساسي من وجودها فقط ل "تحسين" المنتجات و الخدمات و "تيسير" الحياة البشرية بدون ما نستغني عن الدور البشري الفعال فيها 🙏🏽💕.

بالنسبة للمخاوف الأمـنية الأخـلاقية في استخدام تقنية الذكاء الاصطناعي كثيره 🚨. مثلاً، اذا طبقناها في السيارات ذاتية القيادة، كثير من الناس يتخوفون منها و يعتبرونها مو آمنـة 🚘، طيب ليه ⁉️ لان ممكن ان تُخترق السيارة أو يصير فيها خلل و تفقد التحكم بنفسها ! فتتسبب بحادث و بالتالي صعب جداً نحدد المتسبب بكل اللي صار و تكون المسؤولية غير واضحة. استخدام أدوات هذي التقنية تعتبر أيضاً من المخاوف الأمنية فبعض الناس يستغلون أدوات التعلم الآلي المعقدة في الوصول للأنظمة الحساسة و يتعبثون فيها او يلفقون فيديو لشخصيات مؤثره تبين انهم يعملون شي هم ما عملوه اصلاً ❕ .

في النهاية، يا رب نكون قدرنا نوصل لكم صورة ملمة بالذكاء الاصطناعي و طرحناه بأسلوب واضح و سلس، حاولنا نخلي الاسلوب عفوي قد ما نقدر اكثر من انه يكون عملي و جدي عشان يكون خفيف و ممتع لكم 🙏🏽💕.

في حال وجود اي اسئلة، تقدرون تتواصلون معنا عن طريق المحادثة المباشرة الموجودة في الزاوية

أو من خلال حساباتنا في مواقع التواصل الاجتماعي💕.

🐦 : LightSpot19

📷 : 3lightspot